घट्दो ब्याज दरका बाबजुद जीवन बीमा कम्पनीहरुले बैंक तथा वित्तीय संस्थाहरुमा मुद्दती निक्षेप रकम बढाएका छन् । आव २०८०/८१ मा १४ वटा जीवन बीमा कम्पनीहरुले विभिन्न बैंक तथा वित्तीय संस्थामा ५ खर्ब २१ अर्ब ३६ करोड १६ लाख रुपैयाँ मुद्दती निक्षेपमा राखेकाेमा यो रकम आव २०८१/८२ मा १३ दशमलब ८४ प्रतिशतले बढेर ५ खर्ब ९३ अर्ब ५१ करोड २७ लाख रुपैयाँ पुगेको छ।

जीवन बीमा कम्पनीहरुले आफूसँग भएको लगानीयोग्य रकमको ठूलो हिस्सा बैंक तथा वित्तीय संस्थामा मुद्दती निक्षेपको रुपमा राख्ने गरेका छन्। अहिले संस्थागत निक्षेपको ब्याज दर ३ प्रतिशतभन्दा मुनि आएपनि लगानी निर्देशिका अनुसार मुद्दती निक्षेपमा राख्नै पर्ने भएका कारण मुद्दती निक्षेपमा रकम बढेको हो।

तथ्यांक अनुसार १४ वटा जीवन बीमा कम्पनीहरुमध्ये सबैभन्दा बढी नेपाल लाइफ इन्स्योरेन्सको मुद्दती निक्षेपमा बढी लगानी रहेको छ। नेपाल लाइफको विभिन्न मुद्दती निक्षेपमा आव २०८०/८१ मा १ खर्ब ५१ अर्ब ३७ करोड १० लाख रुपैयाँ रहेकोमा आव २०८१/८२मा मुद्दती निक्षेप रकम १२ दशमलब ५८ प्रतिशतले बढेर १ खर्ब ७० अर्ब ४१ करोड ६० लाख रुपैयाँ पुगेको छ। नेपाल लाइफपछि क्रमशः मुद्दती निक्षेपमा बढी रकम राख्ने जीवन बीमा कम्पनीहरुमा लाइफ इन्स्योरेन्स कर्पोरेसन नेपाल, नेसनल लाइफ, हिमालयन लाइफ राष्ट्रिय बीमा संस्थान, सूर्य ज्योति लाइफ, मेट लाइफ, एसियन लाइफ इन्स्योरेन्स, सिटिजन लाइफ इन्स्योरेन्स, सानिमा रिलायन्स लाइफ इन्स्योरेन्स, रिलायवल नेपाल लाइफ, प्रभु महालक्ष्मी लाइफ आईएमई लाइफ र सन नेपाल लाइफ इन्स्योरेन्स रहेका छन्। गत आवमा सबैभन्दा बढी राष्ट्रिय बीमा कम्पनीको मुद्दती निक्षेप रकम २५ दशमलब ७५ प्रतिशतले बढेको छ भने सबैभन्दा कम हिमालयन लाइफ इन्स्योरेन्सको सबैभन्दा कम ५ दशमलब १८ प्रतिशतले बढेको छ।

जीवन बीमा कम्पनीहरुले सबैभन्दा बढी वाणिज्य बैंकमा मुद्दती निक्षेप राख्ने गरेका छन् भने त्यसपछि क्रमशः विकास बैंक, फाइनान्स कम्पनी र पूर्वाधार बैंकमा निक्षेप राख्ने गरेका छन्। आव २०८१/८१ को तथ्यांक अनुसार ५ खर्ब ९३ अर्ब ५१ करोड २७ लाख रुपैयाँ मुद्दती निक्षेपमध्ये झन्डै ९० प्रतिशत निक्षेप वाणिज्य बैंकमा डिपोजिट भएको देखिएको छ भने विकास बैंकमा ८ प्रतिशत र बाँकी रकम मात्रै पूर्वाधार बैंक र फाइनान्स कम्पनीमा डिपोजिट हुने गरेको छ। आव २०८१/८२ मा वाणिज्य बैंकमा ५ खर्ब ३२ अर्ब ४९ करोड १४ लाख रुपैयाँ मुद्दती निक्षेप रहँदा विकास बैंकमा ४८ अर्ब ७० करोड २८ लाख रुपैयाँ मुद्दती निक्षेप रहेको छ भने फाइनान्स कम्पनीहरुमा ७ अर्ब ६४ करोड ८५ लाख रुपैयाँ र पूर्वाधार बैंकमा ४ अर्ब ६७ करोड रुपैयाँ मुद्दती निक्षेपको रुपमा जम्मा भएको छ।

आव २०८०/८१ मा ५ खर्ब २१ अर्ब ३६ करोड १६ लाख रुपैयाँ मुद्दती निक्षेपको रुपमा जम्मा भएकोमा ४ खर्ब ६१ अर्ब ११ करोड ७५ लाख रुपैयाँ वाणिज्य बैंकमा, ४३ अर्ब ९९ करोड १५ लाख रुपैयाँ विकास बैंकमा, ६ अर्ब ९७ करोड ८६ लाख रुपैयाँ फाइनान्स कम्पनीमा र बाँकी ९ अर्ब २७ करोड ४० लाख रुपैयाँ पूर्वाधार बैंकमा मुद्दती निक्षेपको रुपमा जम्मा भएको छ।