नेप्से परिसूचक घट्दो क्रममा रहेसँगै म्युचुअल फन्डहरुको प्रर्दशन पनि खराब हुन थालेको छ ।म्युचुअल फन्डहरुले होल्ड गर्ने कम्पनीको शेयर मूल्यको घटबढको आधारमा मापन हुने म्युचुअल फन्डहरुको खुद सम्पत्ति मूल्य (न्याभ) भदौको तुलनामा असोज महिनामा औसतमा ०.६००४ विन्दुले घटेको छ ।

धितोपत्र बोर्डले सञ्चालन अनुमति दिएका क्लोज इन्डेड र ओपन इन्डेड गरी कुल ५२ वटा म्युचुअल फन्डहरुको असोज महिनाको औसत न्याभ ९ रुपैयाँ ६८ पैसा मात्रै रहेको छ । म्युचुअल फन्डहरुमध्ये अधिकांश अंकित मूल्य १० रुपैयाँ भन्दा पनि तल रहेका छन् ।

भदौ महिनामा म्युचुअल फन्डको औसत न्याभ १० रुपैयाँ २८ पैसा थियो । ५२ वटा म्युचुअल फन्डमा ८ वटाको मात्रै न्याभ १० रुपैयाँ भन्दा माथि रहेको छ । यसको मतलब म्युचुअल फन्डमा लगानी गर्ने अधिकांश लगानीकर्ता अहिले घाटामै रहेका छन् । यद्यपि गत आवको नाफाबाट ३९ वटा म्युचुअल फन्डले न्यूनतम ५ देखि अधिकतम २१ प्रतिशतसम्म नगद लाभांश दिएका थिए। असोज महिनामा सबैभन्दा धेरै न्याभ प्रभु स्मार्ट फन्डको ११ रुपैयाँ ३० पैसा र सबैभन्दा कम न्याभ गरिमा समृद्धि योजनाको ८ रुपैयाँ ९५ पैसा रहेको छ।

म्युचुअल फन्डहरुले बजार घट्दै गए अनुसार लगानी पनि वृद्धि गरेको देखिंदैन । तथ्यांकअनुसार असोज महिनाको भदौ महिनाको तुलनामा २ दशमलब ७८ प्रतिशत कम लगानी नेप्सेमा सूचीकृत कम्पनीहरुमा गरेका छन् भने सूचीकृत नभएका कम्पनीहरुमा पनि म्युचुअल फन्डको लगानी १ दशमलब ७७ प्रतिशतले घटेको देखिएको छ ।

मुद्दतीमा लगानी शुन्य तिर, औसत बैंक ब्यालेन्स २२ प्रतिशतले बढ्यो

मुद्दती निक्षेपमा निरन्तरको गिरावटसँगै म्युचुअल फन्डहरुले मुद्दतीमा पैसा राख्न छोडेका छन् । ५२ वटा म्युचुअल फन्डमध्ये असोज महिनामा १७ वटा म्युचुअल फन्डले मात्रै १ अर्ब ३६ करोड ९० लाख रुपैयाँ रकम मुद्दती निक्षेपमा राखेका छन जुन समयवाधि सकिएपछि नवीकरण हुने छैन । तथ्यांक अनुसार भदौ महिनाका म्युचुअल फन्डहरुको मुद्दती निक्षेपमा लगानी १ अर्ब ५३ करोड ७३ लाख रुपैयाँ थियो । असोज महिनामा अघिल्लो महिनाको तुलनामा यो १० दशमलब ९५ प्रतिशतले घटेको छ ।
असोज मात्रै एउटा नयाँ म्युचुअल फन्ड नेप्सेमा सूचीकृत भएको हुँदा असोज महिनामा म्युचुअल फन्डको बैंक मौज्दाज भदौ महिनाको तुलनामा २२ दशमलब ८४ प्रतिशतले बढेको देखिएको छ । 

म्युचुअल फन्डहरुले धमाधम शेयर नै किनेको भए पनि निररन्तर नेप्से परिसूचक घट्दा न्याभ समेत घटेको देखिएको एक क्यापिटलका कर्मचारीले बताए । असोज महिनाको तथ्यांक अनुसार ५२ वटा म्युचुअल फन्डमध्ये १७ वटाको मात्रै बैंक ब्यालेन्स बढेको छ भने बाँकी सबैको घटेको छ । सबैभन्दा धेरै बैंक ब्यालेन्स बढाउने म्युचुअल फन्डमा एनआईसी एसिया सेलेक्ट–३० को १ करोड बैंक ब्यालेन्स बढेर असोजमा ४ करोड २६ लाख रुपैयाँ पुगेको छ । बैंक ब्यालेन्स ह्वात्तै घटेको म्युचुअल फन्डमा भने ग्लोबल आईएमई ब्यालेन्स फन्ड–१ परेको छ । उक्त म्युचुअल फन्डको भदौमा १२ करोड ३४ लाख रुपैयाँ बैंक ब्यालेन्स रहेकामा असोज मसान्तमा आउँदा घटेर १ करोड १० लाखमा सीमित भएको छ ।

क्लोज इन्डेड म्युचुअल फन्ड शून्य दशमलब ६ अंकले घट्यो

नेप्सेमा सूचीकृत ४० वटा म्युचुअल फन्ड मध्ये ७ वटा म्युचुअल फन्डको मात्रै असोजको न्याभ १० रुपैयाँ भन्दा माथि छ । सबैभन्दा धेरै न्याभ प्रभु सेलेक्ट फन्डको रहेको छ भने गरिमा समृद्धि योजनाको न्याभ सबैभन्दा कम ८ रुपैयाँ ९५ पैसा रहेको छ । भदौ महिनाको तुलनामा सबै नै म्युचुअल फन्डको न्याभ घटेको छ ।

एसआइपीको न्याभ पनि १० रुपैयाँ मुनि

निश्चित अवधिमा केही रकम जम्मा गरेर किनिने ओपन इन्डेड म्युचुअल फन्ड (एसआईपी)को न्याभ समेत १० रुपैयाँ मुनि नै रहेको छ । सेबोनबाट स्वीकृती प्राप्त १२ वटा एसआइपीमध्ये कुमारी सुनौलो लगानी योजनाको मात्रै न्याभ १० रुपैयाँ मात्रै भन्दा माथि रहेको छ । एसआईपीको न्याभ गत भदौको तुलनामा औसतमा शून्य दशमलब शून्य ५ अंकले घटेको छ । एसआईपीमध्ये सबैभन्दा न्यून न्याभमा प्रभु सिस्टमेटिक इन्भेष्टमेन्ट स्किमको न्याभ ९ रुपैयाँ ४० पैसा रहेको छ । सबैभन्दा ठूलो फन्ड भएको एनआईबीएल सहभागिता फन्डको न्याभ ९ रुपैयाँ ४२ पैसा छ ।