नेपाल प्रहरीले शुक्रवारदेखि देशभर ‘निर्वाचन प्रहरी’ (साविकको म्यादी प्रहरी) को भर्ना प्रक्रिया शुरु गरेको हो । प्रहरी प्रधान कार्यालयकाअनुसार निर्वाचन सुरक्षाका लागि कुल १ लाख ४९ हजार ९० जना निर्वाचन प्रहरी भर्ना गर्ने लक्ष्य राखिएको छ ।
जसमध्ये नेपाल प्रहरीले १ लाख ३३ हजार ९८० र सशस्त्र प्रहरी बलले १५ हजार ११० जनाको कोटा पाएको छ । गृह मन्त्रालयको स्वीकृतिपछि नेपाल प्रहरीले पुस २५ गतेदेखि नै आवेदन खुला गरेको हो । देशभरका जिल्ला प्रहरी कार्यालयहरूमा इच्छुक उम्मेदवारहरूको लाम लाग्न थालेको छ । काठमाडौं उपत्यकाका तीनवटै जिल्ला प्रहरी परिसर र उपत्यका बाहिरका सबै जिल्ला प्रहरी कार्यालयमा स्वयं उपस्थित भएर आवेदन बुझाउन सकिने व्यवस्था मिलाइएको छ । आवेदन दिने अन्तिम मिति माघ १ गतेसम्म तोकिएको छ । सार्वजनिक बिदाको दिनमा पनि फारम बुझाउन सकिने प्रहरीले जनाएको छ ।
निर्वाचन प्रहरी बन्न १८ वर्ष पूरा भई ५४ वर्ष ननाघेको नेपाली नागरिक हुनुपर्नेछ । शैक्षिक योग्यता साधारण लेखपढ गर्न जान्ने भए पुग्छ । उम्मेदवार कुनै राजनीतिक दलको सदस्य नभएको, नैतिक पतन देखिने फौजदारी अभियोग नलागेको र शारीरिक–मानसिक रूपमा तन्दुरुस्त हुनुपर्छ । भर्ना प्रक्रिया धमाधम अघि बढेसँगै निर्वाचनको माहोल देशभर तात्न थालेको छ
