मन्त्रालयले निर्वाचन आचारसंहिता अनुगमन अधिकृतका रूपमा तोकिएका सहायक प्रमुख जिल्ला अधिकारीहरूलाई परिपत्र जारी गर्दै निर्वाचन अवधिमा हुन सक्ने आचारसंहिता उल्लङ्घनका घटनाहरू रोक्न आवश्यक कदम चाल्न आग्रह गरेको हो। साथै, अनुगमनका क्रममा गरिएका गतिविधि तथा अवस्थाबारे नियमित रूपमा प्रतिवेदन मन्त्रालयमा पेश गर्न पनि निर्देशन दिइएको छ।
गृह मन्त्रालयकाका अनुसार निर्वाचनलाई मर्यादित बनाउने उद्देश्यले आचारसंहिताको कडाइका साथ अनुगमन गर्न जोड दिइएको हो ।
निर्वाचन आयोगले ‘निर्वाचन आचारसंहिता, २०८२’ को प्रभावकारी कार्यान्वयन सुनिश्चित गर्न जिल्लास्तरमा अनुगमन सुदृढ गर्ने उद्देश्यले ७७ वटै जिल्लाका सहायक प्रमुख जिल्ला अधिकारीलाई आचारसंहिता अनुगमन अधिकृतको जिम्मेवारी तोकेको हो।
यसैबीच, मन्त्रालयले आसन्न प्रतिनिधिसभा निर्वाचनलाई सफल बनाउन सचिवको संयोजकत्वमा केन्द्रीय कमाण्ड पोस्टसमेत गठन गरिसकेको जनाएको छ।
