पार्टी अब उठ्ने बाटोमा लागिसकेको दाबी गरे । पार्टीको वर्तमान दुरावस्था र भविष्यका बारेमा पत्रकारहरूले राखेको प्रश्नको जवाफ दिँदै उनले काँग्रेसले इतिहासमा यस्ता अप्रत्याशित परिणामहरू पहिले पनि भोगेको स्मरण गराए ।
उनले भने, ‘काँग्रेस मासिन बाटोमा गएको होइन, अब उठ्ने बाटो शुरु गरिसक्यो । विगतका इतिहासका घटना हेर्ने हो भने पनि हामीले यस्तो अप्रत्याशित परिणाम नभोगेको होइन । नेपाली काँग्रेसका नेता, कार्यकर्ता र लोकतन्त्रमा विश्वास गर्ने शुभेच्छुकहरू आत्तिनुपर्ने कुनैपनि अवस्था छैन । नयाँ परिस्थितिमा नयाँ ढंगले सोच्ने, नयाँ दृष्टिकोण र विचार बनाउने बेला आएको छ । पार्टी संगठन र नीतिगत पक्षमा पनि नयाँ ढंगले प्रश्तुत हुने अवस्था सिर्जना भएको छ । हामी पार्टीलाई नयाँ ढंगले रिस्ट्रक्चरिङ (पुनर्संरचना) गर्छौँ र यस विषयमा गम्भीर छलफल हुनेछ ।’
उनले बदलिएको परिस्थितिअनुसार पार्टीलाई रूपान्तरण गर्नुपर्ने आवश्यकता रहेको बताए । विशेष महाधिवेशनलाई आफूहरूले अहिलेसम्म उचित नठानेको स्पष्ट पार्दै उनले सर्वोच्च अदालतमा विचाराधीन मुद्दाको फैसला छिटो आओस् भन्ने चाहना व्यक्त गरे । उनले पार्टीको आन्तरिक विषयमा बिस्तारै र गम्भीर रूपमा छलफल गर्दै निष्कर्षमा पुग्ने विश्वास समेत व्यक्त गरे ।
