हरिप्रसाद शर्मा
लामो समयको प्रतिक्षापछि नारायणगढ–बुटवल सडक विस्तार कार्य करिब सकिएको छ । सडक विस्तार कार्य सकिएसँगै विगतका बर्खाहरुमा जस्तो यात्रुले सास्ती खेप्नुपर्ने बाध्यता यसपालीदेखि अन्त्य हुने भएको छ ।

सडक विभागका अनुसार, नारायणगढ–बुटवल सडक विस्तारअन्तर्गत कुल ११४ किलोमिटर सडक दुई खण्डमा विभाजन गरेर ६ लेनमा विस्तार गरिएको हो । हालसम्म सडक कालोपत्रे गर्ने काम सकिएको र ट्राफिक सेफ्टी र ‘बायो इन्जिनियरिङको काम मात्र बाँकी रहेको नारायणगढ–बुटवल सडक विस्तार आयोजनाअन्तर्गत पूर्वी खण्डका प्रमुख इश्वरबहादुर रिजालले बताए ।

उनका अनुसार, निर्माणकर्ता चीनको चाइना स्टेट कन्ट्रक्सन इन्जिनियरिङ कर्पोरेसनले निर्माण कार्यको सम्पूर्ण भुक्तानी पाइसकेको बताए । ‘लामो प्रतिक्षापछि नारायणगढ बुटवल सडक विस्तार कार्य सकिएको छ,’ उनले भने, ‘ट्राफिक सेफ्टी र बायो इन्जिनियरको कामबाहेक सबै काम सकिएको छ । ठेकेदारलाई भुक्तानीको काम पनि सकिएको छ ।’

यसपालीको बर्खादेखि दाउन्नेको दुःख समेत हटेको उनको भनाइ छ । ‘यसपालीको बर्खायाममा दाउन्नेलगायतका ठाउँमा हुने गरेको अवरोध र यात्रुको सास्ती हटेको छ,’ उनले मेरो लगानीसँग भने ।
उनका अनुसार, उक्त सडकखण्डमा कुनै पनि गाडीले कहिँ पनि माटोमा टेक्नु पर्ने छैन् ।

साढे तीन वर्षभित्र निर्माण सम्पन्न गर्ने सम्झौताका साथ २०७५ फागुन ९ गतेदेखि निर्माण सुरु भएको उक्त परियोजना विभिन्न समयमा विभिन्न कारणले ढिलासुस्ती हुन पुग्यो । खासगरी, आयोजना निर्माणजन्य सामग्रीको आपूर्ति र उपलव्धतामा स्थानीय सरकारको अवरोध, प्रदेश र संघ सरकारको समन्वयन नहुनु र वन तथा वातावरण मन्त्रालयले दिने स्वीकृतिको ढिलाइका कारण पनि परियोजना निर्माण लम्बिन पुग्यो । पूर्वी खण्डको ६५ किलोमिटर र पश्चिमखण्डको ४७ किलोमिटरको सडकलाई ६ लेनमा विस्तार गर्ने योजना लिएको थियो ।

निर्माण कार्यमा भएको ढिलाइले वर्षौदेखि उक्त राजमार्ग हुँदै यात्रा गर्ने आम सर्वसाधारणले ठूलो दुःख र सास्ती खेप्नुपरेको थियाे । बुटवलदेखि नारायणगढसम्मको डेढ घण्टाको यात्रा बर्खायाममा १८ देखि २० घण्टासम्म लाग्ने गर्दथ्याे।

दाउन्ने खण्डको सडकको दुरावस्थाका कारण पनि अत्यधिक जाम हुने समस्याले यात्रुहरुलाई दैनिक रुपमा सताइरहेका थियो । कुल १६ अर्ब ९९ करोड ५२ लाख लागत अनुमान गरिएको सडक आयोजनाको लागत पनि केही बढ्ने देखिएको छ ।

बर्खा सकिएपछि ‘ह्यान्डओभर’ हुने

सडक विस्तारको काम सकिएसँगै आउँदो बर्खायाम सकिएसँगै चिनिँया ठेकेदार कम्पनीले उक्त सडक आयोजना नेपाल सरकारलाई हस्तान्तरण गर्ने तयारी गरेको छ । ठेकेदार कम्पनीले आयोजना सम्पन्न गर्नका लागि आगामी २०२६ जुलाइ २३ सम्मको म्याद अझै कायमै छ ।

उक्त अवधिमा ‘मनसुन’ पनि कम हुँदै जाने भएकाले त्यसबेला सडक हस्तान्तरण गरिने उनको भनाइ छ । ‘सडकका बाँकी काम सकेर आउँदो बर्खा वा मनसुन पछि नै हस्तान्तरण गर्न माग गरेका छौं,’ उनले भने, ‘मनसुनपछि नै हस्तान्तरण हुने अपेक्षा लिएका छौं ।’