योसँगै उक्त घटनामा ज्यान गुमाउनेको संख्या दुई पुगेको छ ।
विराटनगरस्थित न्युरो अस्पतालमा उपचाररत देवानगञ्ज-३ का २२ वर्षीय जयप्रकाश मेहताको बिहीबार दिउँसो मृत्यु भएको हो । मोरङ प्रहरीका सूचना अधिकारी प्रहरी नायब उपरीक्षक (डीएसप) मकेन्द्रकुमार मिश्रका अनुसार चिकित्सकले मेहतालाई दिउँसो १.२४ बजे मृत घोषणा गरेका थिए ।
आइतबार राति भएको उक्त हिंसात्मक झडपलाई नियन्त्रणमा लिन प्रहरीले गोली चलाएको थियो । सो क्रममा गोली लागेर घाइते भएका अन्य ८ जनाको अहिले विराटनगरका न्युरो, विराट नर्सिङ होम र नोबेल शिक्षण अस्पतालमा उपचार भइरहेको छ ।
प्रहरी र स्थानीयबीच भएको सो झडपमा सुरक्षाकर्मीसहित २२ जनाभन्दा बढी व्यक्ति घाइते भएका थिए । यसअघि पनि उक्त घटनामा घाइते भएका एक जनाको मृत्यु भइसकेको छ । अहिले घटनाको विषयमा थप अनुसन्धान भइरहेको प्रहरीले जनाएको छ ।
