अहिले देशभर साधारणतया बदली रही कोशी, बागमती र लुम्बिनी प्रदेशका केही स्थानहरूमा मध्यमसम्मको वर्षा भइरहेको छ।
वर्षा र मौसमको अद्यावधिक स्थिति:
-
दिउँसोको मौसम: देशभर साधारणतया बदली रहनेछ। हिमाली तथा पहाडी भू-भागका धेरै स्थानहरूमा मेघगर्जन र चट्याङसहित मध्यम वर्षाको सम्भावना छ। साथै बागमती, गण्डकी, लुम्बिनी र सुदूरपश्चिम प्रदेशका तराई खण्डहरूमा भारी वर्षाको सम्भावना रहेको छ।
-
रातिको मौसम: रातिको समयमा पनि देशभर मौसम बदली नै रहनेछ। पहाडी तथा तराईका क्षेत्रहरूमा वर्षा जारी रहने र केही स्थानहरूमा चट्याङसहित मध्यमदेखि भारी वर्षा हुन सक्नेछ।
-
उच्च जोखिम क्षेत्र: बागमती, गण्डकी, लुम्बिनी र सुदूरपश्चिम प्रदेशका पहाडी तथा तराई भू-भागका एक-दुई स्थानमा अत्यधिक तथा भारी वर्षाको जोखिम रहेको छ।
उच्च सतर्कता अपनाउन अपिल:
भारी वर्षाका कारण पहाडी भू-भागमा गेग्रान बहाव (Debris Flow), पहिरो तथा भू-क्षयको जोखिम रहेको र तराईका नदीहरूमा जलसतह बढेर बाढी आउने सम्भावना छ। दैनिक जनजीवन, सडक तथा हवाई यातायात र कृषि क्षेत्र प्रभावित हुन सक्ने भएकाले जोखिमपूर्ण क्षेत्रका बासिन्दा तथा यात्रुहरूलाई सतर्कता अपनाउन र मौसमसम्बन्धी अध्यावधिक सूचना हेरेर मात्र यात्रा गर्न महाशाखाले अनुरोध गरेको छ।
