अर्थ मन्त्रालयले सार्वजनिक गरेको ‘पुँजी बजार सुदृढीकरण तथा पुनरूत्थान कार्ययोजना, २०८३’ मार्फत नेपाल धितोपत्र बोर्डलाई यससम्बन्धी आवश्यक नियमावली तथा नीतिगत पूर्वाधार तयार गर्न निर्देशन दिएको छ।
मन्त्रालयद्वारा जारी कार्ययोजनाको ११ औँ बुँदामा सूचीकृत संगठित संस्थाहरूको प्रबन्धपत्र तथा नियमावलीमा भएको व्यवस्था अनुरूप कम्पनीको सेयर पुँजीलाई अङ्कित मूल्यभन्दा बढी वा घटी मूल्यमा एकीकृत वा विभाजन गर्न सकिने उल्लेख छ। साथै, कम्पनीहरूले लाभांशका रूपमा वितरण गर्न सक्ने सञ्चित मुनाफाको रकम उपयोग गरी आफ्नै सेयर खरिद (बायब्याक) गर्न पाउने व्यवस्थालाई व्यावहारिक रूपमा कार्यान्वयनमा ल्याउन भनिएको छ।
धितोपत्र बोर्डले सरोकारवालाहरूसँग परामर्श गरी २०८३ माघ मसान्तभित्र यससम्बन्धी नियामकीय तथा नीति-नियमलगायतका पूर्वाधार तयार पारिसक्नुपर्ने समयसीमा तोकिएको छ। अन्तर्राष्ट्रिय सेयर बजारमा सूचीकृत कम्पनीहरूले बजारमा सेयरको अत्यधिक आपूर्ति भई मूल्य घट्दा वा कम्पनीसँग पर्याप्त नगद सञ्चित हुँदा सेयर बायब्याक गर्ने गर्छन्।
यसले बजारमा सेयरको आपूर्ति घटाई प्रतिसेयर आम्दानी (EPS) बढाउन र सेयर मूल्यलाई स्थिर राख्न सहयोग पुर्याउँछ। शेयर बाय ब्याक सुविधाले नेटवर्थ राम्रो भएर पनि शेयर बजारमा राम्रो मूल्य पाउन नसकेका वाणिज्य बैंकहरुले फाइदा उठाउन सक्नेछ। त्यस्तै, उच्च मूल्य भएका सेयरलाई विभाजन (Split) गर्दा साना लगानीकर्ताको पहुँच वृद्धि भई बजारमा तरलता (Liquidity) बढ्ने अपेक्षा गरिएको छ। यसले युनिलिभर जस्ता उच्च मूल्य भएका कम्पनीमा सर्वसाधारणको पहुँच बढ्नेछ।
