राजधानीमा निर्माण गरिएका अग्ला खाले संयुक्त आवासीय भवन अर्थात हाईराईज अपार्टमेन्टहरुमा हालैको बिनासकारी भुकम्पले क्षति पुर्याएपछि त्यसको पुनः प्रयोगलाई लिएर चर्चा सुरु भएको छ । धापासीको पार्क भ्यु होराईजलगायतका मानिस बसोबास गरिरहेका अपार्टमेन्टहरुमा भुकम्पले डरलाग्दो क्षति पुर्याएपछि ती भवनहरु न्जिकबाट हिडडुल गर्नेहरु समेत त्रसित हुने गरेका छन् । 

काठमाडौ उपत्यकामा ७० वटा अपार्टमेन्टहरु निमार्णाधिन रहेकोमा प्रायः सबै जसो अपार्टमेन्टहरुमा केही न केही क्षति भएको छ तर बस्नै नहुने गरी क्षति पुगेका अपार्टमेन्टहरुको संख्या थोरै रहेको नेपाल जग्गा तथा आवास विकास संघले जनाएको छ । संघले सबै हाईराईज अपार्टमेन्टहरुको निरीक्षण गरी यस्तो निष्कर्ष निकालेको हो । अग्ला भवनको पिलर र बीमहरुमा क्षति नपुगी भित्ताहरु मात्र चकिएका र प्लाष्टर खसेका भए मर्मत गरेर बस्न उपयुक्त हुने संघको भनाइ छ ।

बिक्री भएका धेरै अपार्टमेन्टहरुको बीमा गरिएकोले क्षतिपुर्ति प्राप्त गर्न समस्या नहुने बताईएको छ । सगरमाथा ईन्स्योरेन्सले क्षतिग्रस्त पार्क भ्यु होराईजन, सिटिसी मल, सिभिल मल सहित ठूला हाउजिङ र ब्यापारिक भवनको बीमा गरेको छ । बीमा गरिएका कारण अपार्टमेन्टहरुमा कर्जा लगानी गरेका बैंकहरुको पनि लगानी धेरै जोखिममा नपर्ने बताईन्छ । हाईराईज अपार्टमेन्टहरुमा लगानी गरेका बैंकहरुले भुकम्प आउनु भन्दा अगाडि नै कर्जाको सावाँ ब्याज असुलीमा समस्या ब्यहोरिरहेका थिए भने त्यस प्रक्रिया अब थप जटिल हुने भने निश्चित छ ।

नेपालमा २०६० साल यताबाट अपार्टमेन्ट निर्माण गर्ने क्रम सुरु भएको थियो तर नेपालीहरुमा अपार्टमेन्ट भन्दा पनि अलग घर रुचाउने प्रबृत्ति हावी रहेका कारण बनेका अपार्टमेन्ट बिक्रीमा समस्या देखिएको थियो ।

घरजग्गा ब्यवसायी सुधिर बस्नेतले निर्माण गरेका हाउजिङहरु आर्थिक समस्याले पुरा हुन नसकेको बेला महाभुकम्पपछि झन् अन्योल थपेको छ । काठमाडौको मुटु डिल्लीबजारमा दीपक मलहोत्राले निर्माण गरेको हाउजिङ पनि तयार नहुँदै महाभुकम्पले क्षतिग्रस्त बनाएको छ ।