विवादास्पद जलविद्युत कम्पनी नेशनल हाइड्रोले चालु आर्थिक वर्षको पहिलो त्रैमासदेखि सुरु गरेको खुद नाफा कमाउने क्रमलाई यस पटक निरन्तरता दिएको छ । यद्यपी कम्पनीको जगेडा कोष करोडौं रुपैंयाले नोक्सानीमा नै रहेका कारण आशावादी बन्ने ठाउँ भने छैन ।

चालु आर्थिक वर्षको दोस्रो त्रैमासमा कम्पनीले १ करोड ४० लाख रुपैयाँ खुद नाफा आर्जन गरेको छ । यो आम्दानी कम्पनीको दोस्रो त्रैमासको मात्र हो । उक्त खुद नाफालाई कम्पनीले ऋणत्मक जगेडामा समायोजन गरी घटाएको छ । 

चालु आर्थिक वर्षको पहिलो त्रैमासमा कम्पनीले २ करोड ७ लाख २८ हजार रुपैंया खुद नाफा गरेको थियो । गत आर्थिक वर्षको पुस मसान्तमा कम्पनी ९७ लाख २१ हजार रुपैयाँ नोक्सानीमा थियो ।

कम्पनीले यस अवधिमा विद्युत बिक्रीबाट ५ करोड २४ लाख रुपैयाँ आम्दानी गरेको छ । गत आर्थिक वर्षको तुलनामा १४ लाख भन्दा बढीले विद्युत बिक्रीवाट हुने आम्दानी घटेको हो । गत आर्थिक वर्षको दोस्रो त्रैमासमा विद्युत बिक्रीबाट कम्पनीले ५ करोड ३९ लाख रुपैयाँ आम्दानी गरेको थियो ।

१ वर्षको समीक्षा अवधिमा कम्पनीको प्रत्यक्ष खर्चको आकार बढेको छ भने प्रशासनिक खर्चको आकार घटेको छ । गत आर्थिक वर्षमा ट्याक्स पेड अगेन्स डिमाण्ड शिर्षकमा २ करोड ५८ लाख ५५ हजार रुपैंया खर्चिएका कारण नोक्सानमा रहेको कम्पनीले यस आर्थिक वर्षको दोस्रो त्रैमासमा त्यस्तो शिर्षकको खर्च देखाएको छैन । जसका कारण कम्पनी नाफामा गएको देखिएको हो ।

१ अर्ब ३८ करोड ५९ लाख रुपैयाँ चुक्ता पुँजी भएको कम्पनीको जगेडा कोष ४१ करोड ४९ लाख रुपैयाँले ऋणात्मक छ । चालु आर्थिक वर्षको पहिलो त्रैमासमा कम्पनीको जगेडा कोष ४२ करोड ८९ लाख रुपैंयाले ऋणत्मक थियो ।

चालु आर्थिक वर्षको दोस्रो त्रैमासको खुद नाफालाई समायोजन गरेर कम्पनीले जगेडा कोषको ऋणत्मक आकारलाई घटाएको हो । यहि गतिमा कम्पनी अघि बढेको अवस्थामा पनि जगेडा कोष धनात्मक हुनका लागि दशकभन्दा बढी समय लाग्ने देखिन्छ ।

वित्तीय विबरणमा कम्पनीले प्रति शेयर आम्दानी ४ रुपैयाँ ०४ पैसा, प्रति शेयर नेटवर्थ ७० रुपैयाँ ०६ पैसा र मुल्य आम्दानी अनुपात १७.५६ गुणा बढी रहेको देखाएको छ । तर वित्तीय विबरणमा उल्लेख भएको कुन रकमका आधारमा प्रतिशेयर आम्दानी गणना भएको भन्ने प्रष्ट नभएकाले लगानीकर्ता अन्यौलमा परेका छन् ।

प्रत्यक्ष नियमनकारी निकाय नभएको अवस्थामा कम्पनीले निष्काशन गरेको वित्तीय विबरणमा पनि एकरुपता छैन । जसका कारण कतिपय सूचकहरु फरक फरक शैलीमा पस्किँदा ती सूचकलाई आधार मान्ने अवस्था पनि देखिन्न ।

अर्कातिर कम्पनीमा विभिन्न प्षका बिचमा फरक फरक किसिमका मुद्धाहरु चलिरहेका छन् । अदालतमा बिचाराधिन अवस्थामा मुद्धा रहिरहेको अवस्थामा कम्पनी कुन बाटोमा अघि बढ्ला भन्ने चासो सबैमा रहे पनि आकर्षण बन्न सकिरहेको छैन ।