एच एण्ड बी समस्यामा परेपछि राष्ट्र बैंकले व्यवस्थापन नियन्त्रणमा लिदै गत जेठ १४ गते विष्णुमणी गौतमको संयोजकत्वमा तीन सदस्य व्यवस्थापन समिति खटाएको थियो । त्यस लगत्तै पुनरावेदन अदालतका पूर्व न्यायाधीश केशवप्रसाद मैनालीको संयोजकत्वमा पूर्व अतिरिक्त प्रहरी महानिरीक्षक नवराज ढकाल र वरिष्ठ चार्टर एकाउटेन्ट बालमुकुन्द ढुंगाना रहेको छानविन समितिले गुडफर पेमेन्ट चेक काण्डको अनुसन्धान थालेको थियो ।
सो समितिले सेवाग्राहीको रकम जम्मा नभईकन चेक जारी गरेको अवस्था देखिएको, चेक जारी गर्ने तथा चेक धारण गर्नेबीच व्यवसायिक सम्वन्ध नदेखिएको ठहर गरेको थियो । सो बिकास बैंकको कुलेश्वर शाखाबाट निरज नेपाल लगायतका कर्मचारीको मिलेमतोमा भएको बिवादित कारोवार सम्बन्धमा पुनरावेदन अदालत पाटनको वाणिज्य इजलासमा मुद्दा चलिरहेको छ ।
यस काण्डमा तत्कालीन प्रमुख कार्यकारी अधिकृत जशोधा सैंजुलाई बर्खास्त, सञ्चालक समितिलाई निलम्बन तथा केही कर्मचारीलाई सचेतदेखि विभागीय कारवाही गरिएको छ ।
व्यवस्थापन समितिका संयोजक गौतमले गुड फर पेमेन्ट चेक काण्ड छानविन समितिले औल्याए अनुसार सुधारको कार्य अन्तिम चरणमा पुगेकाले बैंकको व्यवस्थापन चाडै निर्वाचित संचालक समितिलाई हस्तान्तरण गरिने बताउनुभयो ।
उहाँले बैंकको अबस्था सवल हुँदै गएको र आत्तिनुपर्ने अबस्था नरहेको भन्दै लगानीकर्तालाई आश्वस्त पार्नुभयो । गौतमले केही बचतकर्ताको रकम खातामा जम्मा नै नभएको बारेमा अनुसन्धान भईरहेको जनाऊ पनि दिनुभयो ।
चालु आर्थिक वर्षको प्रथम त्रैमासको समग्र वित्तीय अवस्था अध्ययन गर्दा बैंकको चुक्ता पुँजी रु.८९ करोड, निक्षेप ४ अर्व ८६ करोड, कर्जा तथा सापटी ४ अर्व १० करोड, कुल प्रोभिजन ९५ करोड २२ लाख रुपैयाँ रहेको संयोजक गौतमले जानकारी दिनुभयो । उहाँका अनुसार यस अवधिको अपरिष्कृत खुद मुनाफा १ करोड १९ लाख रुपैयाँ रहेको छ ।
यसैगरी बैंकको तरलता पर्याप्त रहेको, बैंकको पुँजीकोष पर्याप्तता नेपाल राष्ट्र बैंकले तोके बमोजिम रहेको र अन्य वित्तीय सुचकांक समेत सन्तोषजनक रहेको हुँदा निक्षेपकर्ताको लगानी सुरक्षित भई विस्वासको वातावरण बन्दै गरेको गौतमको भनाई छ ।
