अन्तराष्ट्रिय बजारमा चिप अभावका कारण नेपालमा विद्युतिय गाडीको सप्लाई अझै केहि महिना सहज नहुने भएको छ । अहिले नेपालका विद्युतिय गाडीका आधिकारीक बिक्रेताले ग्राहकले भनेकै समयमा गाडी उपलब्ध गराउन सकेका छैनन् ।

माग अनुसार अन्तराष्ट्रिय बजारबाट विद्युतिय गाडी आयात नभएपछि बुकिङ समेत बन्द गर्ने मोडमा व्यवसायी पुगेका हुन ।

नेपालमा इन्धनबाट चल्ने कमर्सियल गाडीभन्दा तीन गुणा बढी माग विद्युतिय गाडी रहेको छ । अर्को तर्फ नेपालमा इन्धनको मूल्यमा भारि वृद्धि भएसँगै गाडी पारखीको लागि विद्युतिय गाडी तर्फ नै आकर्षण बढेपछि अटो कम्पनीहरुले माग थेग्न सकेका छैनन् ।

हाल २०७९÷०७० खालको बजेट सार्वजनिक हुने दिन पनि नजिकिदै गएको र सरकारले कस्तो नीति ल्याउछ भन्नेमै व्यवसायी जेठ १५ कुरिरहेका छन् ।

नाडा अटोमोबाइल एसोसियसनका उपाध्यक्ष तथा विद्युतिय सवारी समितिका सभापति राजनबाबु श्रेष्ठले नेपालमा अझै केहि महिना विद्युतिय गाडीको सप्लाई सहज नहुने देखिएको बताए ।

‘अहिले अन्तराष्ट्रिय बजारमा व्याट्री र चिप्सको समेत सर्टेज छ, अहिले व्यवसायीहरुले कुनै निर्णय गर्ने अवस्थामै छैनन्’ श्रेष्ठले मेरोलगानीसँग भने ‘ग्राहकले ६ देखि ७ महिना कुरेपछि मात्रै गाडी डेलिभरी भइरहेको छ।’ 

सिप्रदि ट्रेडिङका प्रमुख कार्यकारी अधिकृतसमेत रहेका श्रेष्ठले पछिल्लो समय गाडी बिक्रेता कम्पनीहरुले बुकिङ गरेर मात्रै ग्राहकहरुलाई फर्काइरहेको जनाकारी दिए ।

उनका अनुसार गत महिना सरकारले इन्धनबाट चल्ने सबै चारपाग्रे सवारीमा लगाएको आयात प्रतिबन्ध समेत हटाउन सकारात्मक रहेको श्रेष्ठको भनाई छ । नेपालमा हाल टाटा, एमजी, हुन्डाइ, बिवाईडिका गाडी अभाव जस्तै छ ।

साइमेक्स इङ्क नेपालकी अध्यक्ष एमुना श्रेष्ठले ग्राहकलाई समयमै विद्युतिय गाडी डेलिभरी गर्न सहज वातावरण नभएका बताइन् ।

‘चीनबाट आउने अधिकांश गाडीहरु चीनका केहि शहरमा भएको लकडाउनका कारण आउन सकेका छैनन्’ श्रेष्ठले भनिन ‘नेपालमा स्टक सकिसकेको छ।’  कम्पनीहरुसँग यतिबेला स्टक पनि नभएको व्यवसायीले बताएका छन् ।

चालु आर्थिक बर्ष २०७८/०७९ को आठ महिनामा नेपालमा १४ सय ५७ ओटा विद्युतिय चारपाँग्रे गाडी नेपाल भित्रिएका छन् ।

भन्सार विभागको तथ्याङ्क अनुसार १०० किलोवाट माथिका इलेक्ट्रिक जीप र भ्यान ७३८ओटा आयात भएका छन् । त्यसैगरी, १०० देखि १५० किलोवाटसम्मका १३ ओटा चारपाग्रे गाडी भित्रिएको तथ्याङ्कमा उल्लेख छ ।

त्यसै सयदेखि दुई सय किलोवाटसम्मका ७१९ ओटा इलेक्ट्रिक चारपाँग्रे गाडी आयात भएका छन् भने दुई सयदेखि तीन सय किलोवाटका तीन ओटा विद्युतिय गाडी नेपाल भित्रिएका छन् ।

आयात भएका विद्युतिय गाडी मध्ये भारत र चीनबाट धेरै गाडी आयात भएका छन  भने चीनबाट बिवाइडी, चेरीलगायतका गाडी आयात भएका छन् । कोरियाबाट हुन्डाई,अमेरिकाबाट टेस्ला गाडी आयात भइरहेका छन् ।