आज देखि शुरु भएको भारतको बिहार राज्यको विधान सभा निर्वाचनको २ दिनअघि नै नेपाल भारत सीमाक्षेत्र बन्द गरिएको छ । 

चुनावका बेला गडबडी फैलिने सूचनापछि सुरक्षा एजेन्सीले नेपाल भारत बोर्डर हाइ अलर्टमा राखेको र ३ देखि ७ नम्बरको सीमा पूरै सील गरिएको भारतीय समाचार एजेन्सीहरूले जनाएका छन् ।

नेपालसँग जोडिएको भारतको विहार राज्यमा विधानसभा चुनावको पहिलो चरणको मतदान भइरहेको छ । विहारका ३८ जिल्लाका २४३ विधान सभा क्षेत्रमध्ये आज १८ जिल्लाका १२१ विधानसभा सिटमा मतदान जारी छ ।

राज्यमा दोस्रो चरणको मतदानमा, २० जिल्लाका १२२ विधानसभा सिटहरूमा नोभेम्बर ११ मा मतदान हुनेछ । मतगणना नोभेम्बर १४ मा हुनेछ ।

विहारमा मतदानको दुवै चरणमा ७ करोड ४३ लाखभन्दा बढी मतदाताका लागि ९० हजार ७१२ मतदान केन्द्रहरू स्थापना गरिएको छ । दुवै चरणमा गरि १,३१४ उम्मेदवार चुनावी मैदानमा छन् ।

यसपटक पनि विहारको विधानसभा चुनावमा एनडीए र विपक्षी महागठबन्धनबीच तीव्र प्रतिस्पर्धा हुने मत सर्भेक्षणहरुले देखाएका छन् । तर, केही महिना अघि गठन भएको प्रशान्त किशोरको पार्टी जन सुराज (जनशक्ति जनता दल) ले पनि धेरै सिटमा चुनावी समीकरण बिगार्न सक्ने सम्भावना छ । धेरै सिटहरूमा अन्य साना दलहरू र स्वतन्त्र उम्मेदवारहरू पनि ध्यानमा हुनेछन् ।

भारतको सबैभन्दा ठूलो प्रान्तमध्येको विहार चुनावले सिंगो देशको राजनीतिक उथलपुथल समेत गर्ने भएकाले अहिले प्रधानमन्त्री नरेन्द्र मोदी र विपक्षी दलका नेता राहु गान्धीले भारतीय सत्ता राजनीतिका हस्तिहरू विहार केन्द्रित छन् ।

विहारमा लामो समयदेखि मुख्यमन्त्री चलाइरहेका जनता दल युनाइडेटका नेता नितिशकुमार फेरि एकपटक सोही पदको प्रतिस्पर्धामा छन् । उनलाई मोदीको भारतीय जनता पार्टीसहितका राजनीतिक पार्टीहरुको साथ छ ।

टाइम्स अफ इण्डियाका अनुसार पछिल्लो मत सर्वेक्षणमा मुख्यमन्त्री पदमा पूर्व मुख्य मन्त्री लालु यादवका छोरा तथा पूर्व उपमुख्यमन्त्री तेजस्वी यादव र नितिश कुमारबीच प्रतिष्पर्धा देखिएको छ। उनको पक्षमा ३३ प्रतिशत जनताले मत दिदा नितिश कुमारको पक्षमा २६ प्रतिशतको सर्वेक्षण छ ।
२ दिनअघिको मत सर्वेक्षणले बिजेपी र नितिश गठबन्धनको धेरै सीट आउने प्रक्षेपण गरिएको छ । भाजपा एक्लैले ७० देखि ८१ सीट जित्दा नितिशको पार्टीले ४१ देखि ४८ सीट जित्ने प्रक्षेपण छ ।

उता कांग्रेस, कम्युनिस्ट र लालु यादवका छोरा तेजश्वी यादव नेतृत्वको जनता दल युनाइडे पछिल्लो सर्वेक्षणमा केही सीट पछाडि छ । यो गठबन्धनबाट तेजश्वीको पार्टीले ७० देखि ७८ सीट र कम्युनिस्ट पार्टीका तीनवटा घटकले १२ देखि १७ सीट तथा कांग्रेस आइले पनि त्यसकै हाराहारीमा जित्ने सर्वेक्षण छ ।