सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले इजरायल र साउदी अरबबाट आएका दुई महत्त्वपूर्ण निमन्त्रणालाई अस्वीकार गरेको जानकारी दिएका हुन्। मन्त्री पुनलाई इजरायलको जेरुसेलममा आगामी फेब्रुअरी ४-६ मा आयोजना हुने ‘EducAIton २०२६’ र साउदी अरबको रियादमा मे ३-४ मा हुने ‘Human Capability Initiative (HCI)’ मा सहभागी हुन औपचारिक निमन्त्रणा आएको थियो। तर, उनले ती कार्यक्रममा सहभागी नहुने अडान लिएका छन्। मन्त्री भए यता आफूलाई आएका पाँच वटा वैदेशिक भ्रमणका प्रस्तावमध्ये कुनैमा पनि सहभागी नभएको उनले स्पष्ट पारेका छन्।
आफ्नो पोस्टमा आक्रोश व्यक्त गर्दै उनले लेखेका छन्, "देशको अर्थतन्त्र नसुधारेसम्म जोसुकै प्रधानमन्त्री वा अर्थमन्त्री आए पनि केही प्रगति हुनेवाला छैन, किनभने केही गर्न पैसा चाहिन्छ। के विदेश घुमेर अर्थतन्त्र बन्छ ?" उनले वैदेशिक भ्रमणमा खर्च गर्नुभन्दा देशको आन्तरिक आर्थिक अवस्था सुधार्न प्राथमिकता दिनुपर्नेमा जोड दिएका छन्। सार्वजनिक पदमा बसेर पनि सरकारी खर्चमा हुने विदेश भ्रमण त्याग्ने मन्त्री पुनको यो कदमको सामाजिक सञ्जालमा प्रशंसा भइरहेको छ।
