टेक्ससको ड्यालस स्टेडियममा खेलिएको उक्त तनावपूर्ण र रोमाञ्चक खेलको अन्तिम समयमा स्पेनले गरेको गोल नै निर्णायक साबित भयो। यस पराजयसँगै पोर्चुगलका ४१ वर्षीय लेजेन्ड स्ट्राइकर क्रिस्टियानो रोनाल्डोको विश्वकपको ऐतिहासिक यात्रा निकै भावुक अन्त्यका साथ समाप्त भएको छ।
खेलको सुरुवातदेखि नै दुवै टोलीले रक्षात्मक र आक्रामक रणनीतिलाई सँगसँगै अघि बढाएका थिए। पहिलो हाफमा स्पेनका युवा खेलाडी लामिन यमाल र पोर्चुगलका कप्तान क्रिस्टियानो रोनाल्डोले गोल गर्ने केही प्रयास गरे पनि दुवै टोलीका गोलकिपरहरू (उनाई सिमोन र डिओगो कोस्टा) ले उत्कृष्ट बचाउ गरे। जसका कारण पहिलो हाफ ०–० को बराबरीमा सकियो।
दोस्रो हाफमा दुवै प्रशिक्षकले गोलको खोजीमा खेलाडीहरू परिवर्तन गरे। पोर्चुगलले राफेल लियाओ र बर्नार्डो सिल्भालाई मैदानमा उतारेर काउन्टर अट्याक बढाएको थियो भने स्पेनले पनि मिडफिल्ड बलियो बनाउन मिकेल मेरिनो र फेरान टोरेसलाई मैदानमा पठायो।
खेल अतिरिक्त समयतर्फ धकेलिने निश्चित देखिइरहेका बेला ९०औँ मिनेटको खेल सकिएर थपिएको इन्जुरी समयको पहिलो मिनेटमा स्पेनले फ्रि-किक पायो। रोड्रीले द्रुत गतिमा लिएको फ्रि–किक पासमा फेरान टोरेसले डिबक्सभित्र चलाखीपूर्ण पास मिलाइदिए, जसमा वैकल्पिक खेलाडी मिकेल मेरिनोले उत्कृष्ट र सानदार प्रहार गर्दै बललाई नेटको जाली चुमाए।
आफ्नो खेल जीवनको छैटौँ तथा अन्तिम विश्वकप खेलिरहेका क्रिस्टियानो रोनाल्डोले खेल अवधिभर गोलका लागि कडा संघर्ष गरे पनि स्पेनको मजबुत डिफेन्सलाई तोड्न सकेनन्। रेफ्रीको अन्तिम सिट्ठी बजेलगत्तै पोर्चुगिज कप्तान मैदानमै भावुक बन्दै आँसु रोक्न संघर्ष गरिरहेका देखिए। विश्वकप इतिहासमा लगातार ६ वटा संस्करणमा गोल गर्ने पहिलो खेलाडीको कीर्तिमान बनाएका रोनाल्डोको विश्वकप ट्रफी जित्ने सपना अब सधैँका लागि अपूर्ण बनेको छ।
यस जितसँगै स्पेनले यस विश्वकप २०२६ मा आफ्नो ‘क्लिन–शिट’ (एक गोल पनि नबेहोरेको) यात्रालाई पाँचौँ खेलसम्म कायम राखेको छ। स्पेनका गोलकिपर उनाई सिमोन र रक्षापंक्तिको यो प्रदर्शन यो विश्वकपकै सबैभन्दा उत्कृष्ट रक्षात्मक रेकर्ड बनेको छ।
पोर्चुगलको यात्रा समाप्त गर्दै क्वार्टरफाइनलमा पुगेको स्पेनले सेमिफाइनल प्रवेशका लागि आगामी शनिबार अमेरिका वा बेल्जियम मध्ये एक विजेतासँग लस एन्जलसमा प्रतिस्पर्धा गर्नेछ।
