राष्ट्र बैंकले बुधबार सूचना जारी गर्दै बबरमहलस्थित टक्सार महाशाखाबाट कात्तिक १९ र २० गते सुनको असर्फी तथा चाँदीका मेडालियन बिक्री गर्ने जानकारी दिएको हो। दुवै दिन बिहान ११ बजेदेखि दिउँसो ३ बजेसम्म खरिद गर्न सकिनेछ।
राष्ट्र बैंकका अनुसार प्रतिव्यक्ति २।५ ग्रामको एक थान सुनको असर्फी बिक्री गरिनेछ। त्यस्तै, १० ग्रामका लक्ष्मी र गणेश अंकित चाँदीका मेडालियन पनि उपलब्ध हुनेछन्। एक व्यक्तिले बढीमा दुई थानसम्म चाँदीका मेडालियन खरिद गर्न सक्नेछन्।
असर्फी तथा मेडालियन खरिद गर्न इच्छुक नेपाली नागरिकले नागरिकता वा राष्ट्रिय परिचयपत्रको प्रतिलिपि अथवा ती कागजातको नम्बर उल्लेख भएको अन्य प्रमाणपत्रसहित स्वयं उपस्थित हुनुपर्नेछ। खरिदको भुक्तानी नगद वा क्यूआरमार्फत गर्न सकिने राष्ट्र बैंकले जनाएको छ।
राष्ट्र बैंकले सुनको असर्फी तथा चाँदीका मेडालियनको मूल्य दैनिक रूपमा बिहान करिब ११ बजेपछि निर्धारण गर्ने जनाएको छ। मूल्य निर्धारण भएपछि मात्रै बिक्री प्रक्रिया सुरु हुनेछ।
