यदि तपाईं ७ सिटे एसयूभी किन्ने योजनामा हुनुहुन्छ भने, यही अगस्ट महिना तपाईंको लागि विशेष हुन सक्छ। 

अटोमोबाइल क्षेत्रका दुई ठूला कम्पनी जेएसडब्ल्यू एमजी मोटर इन्डिया र महिन्द्रा एण्ड महिन्द्राले आफ्ना नयाँ ७ सिटे मोडेलहरू बजारमा सार्वजनिक गर्ने तयारी गरिरहेका छन्।

यद्यपि, कम्पनीहरूले यसबारे आधिकारिक घोषणा भने गरिसकेका छैनन्। प्राप्त जानकारीका अनुसार ती गाडीहरु अगस्ट २०२६ मा सार्वजनिक हुने भनिएको छ ।

एमजी ७–सिटे इलेक्ट्रिक एसयूभी

एमजी मोटरले आफ्नो नयाँ 'ADAPT' प्लेटफर्ममा आधारित प्रिमियम इलेक्ट्रिक एसयूभी सार्वजनिक गर्ने तयारी गरेको छ। यो गाडी वुलिङ एक्सियन (Wuling Eksion) मा आधारित हुनेछ।

यो गाडीमा ६९ किलोवाटको ब्याट्री प्याक र २१० बीएचपी क्षमताको इलेक्ट्रिक मोटर रहनेछ। एक पटकको फुल चार्जमा यसले ६०० किलोमिटरको रेन्ज दिने दाबी गरिएको छ। यसमा २३२ को सिट कन्फिगरेसन हुनेछ, जसमा दोस्रो लहरमा बेन्च सिट र तेस्रो लहरमा दुईवटा व्यक्तिगत सिटहरू रहनेछन्।

गाडीमा १२.८ इन्चको फ्लोटिङ टचस्क्रिन, ८.८ इन्चको डिजिटल इन्स्ट्रुमेन्ट क्लस्टर, लेभल–२ एडास, ३६०–डिग्री क्यामेरा र वायरलेस चार्जर जस्ता अत्याधुनिक सुविधाहरू हुनेछन्।

२०२६ महिन्द्रा स्कर्पियो–एन फेसलिफ्ट

महिन्द्राले आफ्नो परम्परालाई निरन्तरता दिँदै आगामी सन् २०२६ को अगस्ट १५ (भारतीय स्वतन्त्रता दिवस) को अवसर पारेर स्कर्पियो–एनको फेसलिफ्ट संस्करण सार्वजनिक गर्ने सम्भावना छ।

के हुनेछन् परिवर्तनहरू?

नयाँ स्कर्पियो–एनमा केही बाहिरी परिवर्तनहरू देखिनेछन्। जसमा परिमार्जित ग्रिल, नयाँ बम्पर, नयाँ हेडल्याम्प, फग ल्याम्प हाउजिङ र नयाँ डिजाइनको एलोय ह्विल्स समावेश हुनेछन्। भित्री भागमा १०.२५ इन्चको ठूलो टचस्क्रिन इन्फोटेनमेन्ट सिस्टम र नयाँ सिट कभरहरू प्रयोग गरिने सम्भावना छ।

मेकानिकल रूपमा भने गाडीमा कुनै ठूलो परिवर्तन हुने छैन। यसले हालकै २.० लिटर टर्बो पेट्रोल र २.२ लिटर डिजेल इन्जिनलाई निरन्तरता दिनेछ।

यी दुवै एसयूभीहरूले सार्वजनिक भएपछि ७ सिटे गाडीको बजारमा नयाँ प्रतिस्पर्धा सिर्जना गर्ने अपेक्षा गरिएको छ। विशेष गरी प्रिमियम फिचर्स र इलेक्ट्रिक विकल्प खोज्ने ग्राहकका लागि यी उत्कृष्ट छनोट हुन सक्छन्।