आयोजकका अनुसार बुधबार मात्रै २६ हजारभन्दा बढी दर्शक एक्स्पोमा पुगेका थिए भने उद्घाटनको दिन २९ हजारभन्दा बढीले अवलोकन गरेका थिए।
एक्स्पोमा विशेषगरी विद्युतीय सवारीको ब्याट्री क्षमता, मोटर, रेन्ज र आफ्टर–सेल्स सर्भिसबारे अवलोकनकर्ताको चासो देखिएको छ। ग्राहक आकर्षित गर्न कम्पनीहरूले मूल्य छुट, निःशुल्क बिमा तथा सर्भिसिङ, सवारी कर छुट र सहुलियत ब्याजदरमा कर्जालगायत सुविधा दिएका छन्।
दोस्रो दिन विभिन्न ब्रान्डले चार नयाँ मोडल सार्वजनिक गरेका छन्। पहिलो दिन ४८ नयाँ मोडल सार्वजनिक गरिएको थियो। नेपालमा दिगो, हरित तथा प्रविधिमैत्री यातायात प्रणाली प्रवर्द्धन गर्ने उद्देश्यले आयोजित एक्स्पो साउन ३१ गतेसम्म सञ्चालन हुनेछ। आयोजकले एक्स्पो अवधिभर करिब डेढ लाख दर्शक पुग्ने अपेक्षा गरेको छ।
एक्स्पोमा नयाँ विद्युतीय कार, ई–स्कुटर तथा विद्युतीय व्यावसायिक सवारीसाधन मुख्य आकर्षण बनेका छन्। बैंक तथा वित्तीय संस्था र बिमा कम्पनीहरूले पनि सवारी खरिदका लागि विभिन्न सहुलियत तथा विशेष अफर उपलब्ध गराइरहेका छन्।
