कम्पनीका अनुसार बिहीबार भएको यस घटनाबाट करिब ६.३ अर्ब अमेरिकी डलर (करिब ४.७ अर्ब पाउन्ड) बराबरको डिजिटल सम्पत्ति प्रभावित भएको छ। यद्यपि, अन्य प्लेटफर्महरूको सहयोगमा चोरी भएको करिब आधा रकम रोक्का (फ्रिज) गरिसकिएको र यस आक्रमणबाट ग्राहकलाई हुने "सम्पूर्ण घाटा कम्पनी आफैँले बेहोर्ने" बिनान्सले स्पष्ट पारेको छ।
प्रारम्भिक अनुसन्धान अनुसार कम्पनीकै एक इन्जिनियरको ल्यापटप ह्याक गरी आक्रमणकारीहरूले अनधिकृत रूपमा रकम निकालेको देखिएको छ।
दुईवटा क्रिप्टो विश्लेषक संस्थाले यस आक्रमण पछाडि उत्तर कोरियाली ह्याकिङ समूह ‘ट्रेडरट्रेटर’ (TraderTraitor) को हात रहेको दाबी गरेका छन्। सोही समूहले सन् २०२५ मा ‘बाइबिट’ एक्सचेन्जबाट १.५ अर्ब डलर चोरी गरेको थियो।
आर्टिफिसियल इन्टेलिजेन्स (एआई) मा आधारित ब्लकचेन अनुसन्धान कम्पनी ‘टीआरएम ल्याब्स’ (TRM Labs) ले बिनान्स आक्रमणका धेरै पक्षहरू यसअघिको बाइबिट ह्याकलगायत उत्तर कोरियासँग सम्बन्धित अन्य घटनासँग मिल्दोजुल्दो रहेको जनाएको छ।
टीआरएम ल्याब्सका विश्वव्यापी नीति प्रमुख एरी रेडबोर्डले बीबीसीसँग कुरा गर्दै बिनान्स ह्याक समग्र क्रिप्टो उद्योगकै लागि एउटा "अभूतपूर्व धक्का" भएको टिप्पणी गरे। उनका अनुसार आक्रमणकारीहरूसँग अझै पनि ठूलो परिमाणमा चोरी भएको सम्पत्ति रहेकाले सो रकम पत्ता लगाउने र फिर्ता ल्याउने प्रयास अझै चुनौतीपूर्ण छ।
त्यसैगरी, अर्को क्रिप्टो एनालिटिक्स कम्पनी ‘चेनालिसिस’ (Chainalysis) ले पनि यस आक्रमणमा उत्तर कोरियाली समूहकै संलग्नता रहेकोमा आफूहरू "विश्वस्त" रहेको जनाएको छ। कम्पनीका अनुसन्धान प्रमुख एरिक जार्डिनले क्रिप्टो प्लेटफर्महरूमा ठूलो धनराशि हुने भएकाले ती ह्याकरहरूको प्रमुख निशाना बन्ने गरेको भन्दै सबै एक्सचेन्जहरूलाई उच्च सतर्कता अपनाउन आग्रह गरेका छन्।
यस घटनामा उत्तर कोरियाको सम्भावित संलग्नताबारे बीबीसीले राखेको जिज्ञासामा बिनान्सले प्रत्यक्ष जवाफ दिएन। तर कम्पनीले भनेको छ, "अपराधीहरूको पहिचान पुष्टि गर्न र उनीहरूलाई कानुनी कठघरामा ल्याउन हामी कानुन कार्यान्वयन गर्ने निकायहरूसँग नजिकबाट काम गरिरहेका छौँ।"
यो घटना मुख्य प्लेटफर्म ‘बिनान्स डटकम’ (Binance.com) सँग सम्बन्धित हो। अमेरिकी नागरिकहरूलाई लक्षित गरी सञ्चालन गरिएको तुलनात्मक रूपमा सानो प्लेटफर्म ‘बिनान्स डट युएस’ (Binance.US) भने यसबाट प्रभावित नभएको कम्पनीले प्रस्ट पारेको छ।
घटनापछि सामाजिक सञ्जालमा पोस्ट गर्दै बिनान्सकी सह-प्रमुख कार्यकारी (को-सीईओ) ही यीले चोरी भएको सम्पत्ति रोक्का गर्न सहयोग गर्ने विभिन्न क्रिप्टो कम्पनीहरूलाई धन्यवाद दिएकी छन्। उनले लेखेकी छन्, "सुरक्षा हाम्रो पहिलो प्राथमिकता हो। प्रणाली पूर्ण रूपमा सुरक्षित भएको पुष्टि नभएसम्म रकम निकाल्ने (विथड्रअल) सुविधा अस्थायी रूपमा बन्द गरिएको छ।"
यसैबीच, बिनान्स ह्याकको खबरपछि दुई प्रमुख क्रिप्टो कम्पनीहरू टिथर (Tether) र सर्कल (Circle) ले कुल २.४ अर्ब डलरबराबरको सम्पत्ति रोक्का गरेको जानकारी दिएका छन्।
सर्कलका प्रमुख कार्यकारी जेरेमी अलायरका अनुसार उनको कम्पनीले घटनासँग सम्बन्धित ८० करोड डलरभन्दा बढी मूल्यको 'यूएसडीसी' (USDC) सम्पत्ति रोक्का गरिसकेको छ। त्यस्तै, टिथरका सीईओ पाओलो अर्डोइनोले 'यूएसडीटी' (USDT) को करिब १.६ अर्ब डलर रकम रोक्का गरिएको बताएका छन्।
अमेरिकी राष्ट्रपति डोनाल्ड ट्रम्प र उनको परिवारसँग आबद्ध क्रिप्टो कम्पनी ‘वर्ल्ड लिबर्टी फाइनान्सियल’ ले पनि चोरी भएको रकम रोक्का गर्न साझेदारहरूसँग मिलेर काम गरिरहेको जनाएको छ। अर्को प्रमुख क्रिप्टो एक्सचेन्ज ‘क्वाइनबेस’ ले भने आफू यस घटनाबाट सुरक्षित रहेको र स्थितिलाई नजिकबाट नियालिरहेको बताएको छ।
सन् २०१७ मा चीनमा स्थापना भएको बिनान्स हाल विश्वभर ३० करोडभन्दा बढी दर्ता भएका प्रयोगकर्ता भएको प्लेटफर्म हो। विश्वभरका नियामक निकायहरूको कडा निगरानी खेपिरहेको यस कम्पनीले सन् २०२४ मा आफूसँग १६० अर्ब डलरभन्दा बढीको सम्पत्ति कस्टडी (सुरक्षित राख्ने जिम्मेवारी) मा रहेको जनाएको थियो।
ह्याकिङको खबर सार्वजनिक भएसँगै बिटक्वाइनको मूल्य ४ प्रतिशतभन्दा बढीले घटेको छ भने इथरियम, सोलानालगायत अन्य प्रमुख क्रिप्टोकरेन्सीहरूको भाउमा पनि तीव्र गिरावट आएको छ।
