पूँजी वृद्धिको नयाँ प्रस्ताव पारित भएसँगै अब कम्पनीको कुल पूँजी २ अर्ब २० करोड रुपैयाँ पुग्ने भएको छ, जसमध्ये १ अर्ब ७६ करोड रुपैयाँ संस्थापक शेयर र बाँकी ४४ करोड रुपैयाँ आइपीओको रुपमा निष्काशन गर्नेछ। कम्पनीले आगामी पुस महिनाभित्रै सर्वसाधारणका लागि आईपीओ निष्कासन गर्ने तयारी गरेको छ भने जतिसक्दो छिटो आईपीओ स्वीकृतिका लागि आवश्यक प्रक्रिया पूरा गर्न कम्पनी तदारुकताका साथ अघि बढेको छ।
कम्पनीका अध्यक्ष महेन्द्रकुमार गिरीको अध्यक्षतामा सम्पन्न भएको उक्त सभामा उनले छरिएर रहेको स–सानो पूँजीलाई एकीकृत गरी राष्ट्रिय अर्थतन्त्र र दिगो परियोजनाहरूमा लगानी गर्नु कम्पनीको मुख्य उद्देश्य रहेको बताए। विशेषगरी हरित लगानी, हरित अर्थतन्त्र, वातावरणीय संरक्षण र दिगो विकासको अवधारणालाई आत्मसाथ गर्दै आएको यस कम्पनीले जलविद्युत्, सौर्य ऊर्जा, कृषि, पर्यटन, सूचना प्रविधि र खनिज उत्खनन् जस्ता बहुआयामिक क्षेत्रमा आफ्ना अल्पकालीन, मध्यकालीन र दीर्घकालीन लगानी विस्तार गरिरहेको छ। सामाजिक र वित्तीय क्षेत्रका लब्धप्रतिष्ठित व्यक्तित्वहरूद्वारा सञ्चालित यस संस्थाले शेयरधनीहरूलाई उच्चतम प्रतिफल दिने लक्ष्य राखेको छ। अध्यक्ष गिरीले आईपीओ निष्कासनसँगै कम्पनी सार्वजनिक स्वामित्वमा प्रवेश गर्ने र यसले पारदर्शिता, उत्तरदायित्व र संस्थागत सुदृढीकरणलाई थप मजबुत बनाउने बताउँदै हरित ऊर्जा र वातावरणमैत्री परियोजनामा लगानीमार्फत आर्थिक प्रतिफलसँगै रोजगारी सिर्जना, प्रविधि हस्तान्तरण र वातावरणीय सन्तुलनमा दीर्घकालीन योगदान गर्ने लक्ष्य लिएको स्पष्ट पारे।
कम्पनीकी सञ्चालक कल्पना विश्वकर्माको स्वागत मन्तव्यबाट सुरु भएको सभामा प्रबन्ध सञ्चालक कृष्ण रानाभाटले विशेष साधारणसभाको आवश्यकता र औचित्यसहित कम्पनीका हालका गतिविधिबारे शेयरधनीहरूलाई जानकारी गराएका थिए। कार्यक्रममा सञ्चालकहरू गोपाल भट्टराई र पवनलाल राजवंशीको समेत उपस्थिति रहेको थियो भने कार्यक्रमको सञ्चालन कम्पनीका शेयर सदस्य एकराज गिरीले गरेका थिए। झापाको बिर्तामोडमा मुख्य कार्यालय र काठमाडौंको बानेश्वर हाइटमा सम्पर्क कार्यालय रहेको यस कम्पनीले गत २०८२ पुस २७ गते आफ्नो तेस्रो वार्षिक साधारणसभा सम्पन्न गरिसकेको छ।
